دفتر حساباتك جوة تلقرام · لأي شغل في السودان
صوّر الإشعار.
الباقي عليّ أنا.
أنا عباس، محاسبك الشخصي. رسل لي صورة أي إشعار تحويل من بنكك أو فوري أو أوكاش أو أي بنك تاني، وأنا بقرا المبلغ ورقم العملية وأرقام الحسابات والتاريخ. تأكيد واحد منك وتتسجّل في دفترك.
- ما في تطبيق تنزّلو
- بيشتغل على أي تلفون، محتاج بس تطبيق تلقرام
- خفيف على الداتا
- عربي من أول رسالة
دا شكل الشغل كلو. شات واحد، وما في حاجة تانية تتعلّمها.
- المبلغ
- 760,000 ج.س
- رقم العملية
- 20884856355
- من حساب
- 0033 0487 7176 0001
- إلى حساب
- 0593 0323 5916 0001
- المرسل إليه
- محل النور للمواد الغذائية
- التاريخ والزمن
- اليوم · 21:19
المشكلة الحقيقية
ما في ربط تلقائي مع البنوك.
في بس صورة إشعار.
-
الدفع كلو تحويل وصورة
البنوك ما بتدي التجار ربط تلقائي. كل عملية بتخلص بكلمة «حوّلت ليك، شوف حسابك» وصورة إشعار في الواتساب.
-
الإشعارات المضروبة بقت كتيرة
تطبيقات مقلّدة وصور معدّلة، وقضايا موثقة عند الشرطة. وما في أداة واحدة بتساعد التاجر يلاحظ التكرار أو التلاعب.
-
الدفتر لسه كشكول وقلم
ما في برنامج حسابات سوداني أصلاً. حساباتك موزّعة بين الكشكول، وقائمة عمليات البنك، وشاتات الواتساب.
أربع خطوات وخلاص
من أول ما تفتح الشات لحد ما يوصلك كشف الشهر.
افتح الشات
اكتب اسم شغلك في رسالة واحدة ودفترك يفتح. ما في تسجيل ولا كلمة سر.
رسل الصورة
صوّر الإشعار بكاميرا تلقرام طوالي، أو رسل الصورة من المعرض. ما محتاجة تقطيع ولا توضيح.
أكّد أو عدّل
بوريك كل الحقول اللي قريتها، تأكد بضغطة أو تعدّل الحقل الغلط بنفسك.
استلم كشفك
كشف اليوم أو الأسبوع أو الشهر في الشات، جاهز ترسلو لشريكك.
شغل عباس بالتفصيل
كل حاجة هنا بتشتغل جوة تلقرام. ما في لوحة تحكم تفتحها ولا كلمة سر تنساها.
قراية الإشعارات
بنكك وفوري وأوكاش وأي بنك تاني. بقرا المبلغ ورقم العملية وحساب الطرفين والاسم والتاريخ والزمن.
تعديل الحقول
لو قريت حقل غلط، اضغط ✏️ تعديل واختار الحقل واكتب الصاح — والباقي زي ما هو.
درج النقدية
رصيد درجك محسوب عملية بعملية، تعرفو قبل ما تقفل.
دخل ومصروف نقدي
زر واحد للنقدي الداخل وزر للمصروف، تكتب المبلغ وملاحظة وخلاص.
ملاحظة التكرار
لو رقم العملية اتسجّل قبل كدا، بنبهك بتاريخ العملية القديمة.
مطابقة كشف الحساب
رسل كشف البنك PDF أو صور، والمطابقة سطر سطر تتعمل براها وتجيك الفروقات بس.
الكاشير معاك
لينك واحد للكاشير يسجّل ويأكد في نفس الدفتر، وكل عملية عليها اسم صاحبها. التقارير وكشف العمليات ليك انت براك، وعملية اتأكدت ما بيقدر يعدّلها.
شغل بشبكة ضعيفة
الصور بتوصل مضغوطة من تلقرام، والرسائل خفيفة على الداتا.
حدود واضحة، وتأكيد منك
جرّبنا القراية على أصعب الصور اللي ممكن توصلك
صور مضغوطة من الواتساب، وصور من الفيسبوك، وفريمات من اليوتيوب. أصعب بكتير من الصورة العادية اللي بتوصلني في الشغل اليومي. القراية بتبدأ بقوالب جاهزة لكل بنك، ولو الصورة تعبانة بتمشي للذكاء الاصطناعي كحل تاني، وفي الحالة دي التأكيد منك بيبقى إلزامي.
- قوالب لكل بنك
- حل تاني للصور الصعبة
- تأكيدك دايماً آخر خطوة
الحد الأدنى المقبول لكل حقل
- المبلغ≥ 95%
- رقم العملية≥ 95%
- اسم البنك≥ 95%
- التاريخ≥ 90%
- اسم المرسل≥ 80%
المبلغ ورقم العملية عليهم أعلى حد، لأنهم الحاجة اللي غلطها بيكلّفك قروش فعلية.
الإشعارات المضروبة
ما بقول ليك «متحقق».
بقول ليك «انتبه».
أي صورة ممكن تتعدّل، وأي زول يقول ليك عكس دا بيكضب عليك. اللي بقدر أعملو إني ألاحظ الحاجات المريبة وأوريك ليها، والقرار في الآخر قرارك انت بعد ما تشوف حسابك.
- رقم عملية مكرر. لو نفس الرقم مسجّل عندك قبل كدا، بنبهك بتاريخ العملية القديمة قبل ما تأكد.
- نفس الصورة تاني. لو الصورة دي بعينها اتبعتت للدفتر قبل كدا، بوقف قبل ما أقراها وبقول ليك امتى اتسجّلت وبكم.
- نفس المبلغ ونفس الوقت. لو في عملية مسجّلة بنفس المبلغ ونفس تاريخ ووقت الإشعار، بوريك الرقمين جنب بعض عشان تقارنهم بالصورة — أحياناً القراية غلطت في رقم واحد وهي نفس العملية.
- بقول ليك قريت بأي دقة. مع كل إشعار بيجي «دقة القراءة»، ولو الصورة كانت صعبة ومشت للذكاء الاصطناعي بعلّم القراية دي إنها تقديرية عشان تراجعها انت.
- التأكيد الحقيقي من الكشف. الحاجة الوحيدة اللي بتحسم هي كشف حسابك، ومطابقتو مع دفترك بعملها ليك في دقايق أول ما ترسلو.
شكل التنبيه في الشات
- اتسجّلت بتاريخ
- 2026-07-11
- المبلغ
- 760,000 ج.س
- رقم العملية
- 20884856355
لو دي دفعة تانية منفصلة اضغط «افحصها برضو» — غير كدا الأحسن تلغيها عشان الحساب ما يتضاعف.
القرار قرارك دايماً — ما في عملية بتتسجّل ولا بتتلغى من غير ما تضغط انت.
مسكها ليك عباس المحاسب · @abbassakbot
التقارير
كشف تفهمو من أول نظرة، ويمشي واتساب
اطلب كشف اليوم أو الأسبوع أو الشهر، ويجيك في الشات فوراً: الداخل، الخارج، الصافي، عدد العمليات، وأكتر الزباين تحويلاً. وبعد داك ترسلو لشريكك أو لمحاسبك من غير ما تطلع من التلفون.
اليوم
قبل ما تقفل تعرف دخلك ورصيد درجك.
الأسبوع
مع مطابقة جاهزة مع كشف حسابك.
الشهر
صورة كاملة للشهر تحتفظ بيها أو ترسلها لمحاسبك.
مطابقة كشف الحساب
رسل كشف حسابك، والمطابقة تتعمل براها
آخر الأسبوع بتقعد ساعتين تقارن دفترك بكشف البنك سطر سطر. الحكاية دي بقت رسالة واحدة: رسل الكشف PDF زي ما نزل من تطبيق البنك، أو صور ليه، وأنا بقرا كل سطر وبطابقو بنفسي.
عملية مسجّلة في دفترك
اتطابقت مع الكشف براها
فروقات بين دفترك والكشف
سطر تقارنو بإيدك
مثال توضيحي لشكل النتيجة في مطابقة أسبوع واحد.
كيف بتمشي
- رسل الكشف في الشات. ملف PDF من تطبيق البنك، أو صور للكشف الورقي، والاتنين ماشين.
- بقرا كل سطر في الكشف. التاريخ والمبلغ ورقم العملية، وبرتبهم في جدول واحد جانب عمليات دفترك.
- بطابق برقم العملية أولاً. ولو الرقم ناقص، بطابق بنفس المبلغ ونفس التاريخ بالضبط، وأي سطر ملتبس ما بخمّنو.
- بوريك الفروقات بس. المتطابق بيتقفل براهو، وانت بتتفرج على السطور المختلفة وتقرر فيها.
أنا بساعدك تقارن بس، والمرجع النهائي في الآخر كشف حسابك في البنك.
شكل النتيجة في الشات
سجّلها عشان دفترك يكتمل — صوّر إشعارها أو أدخلها دخل يدوي.
- في دفترك
- 760,000 ج.س
- في الكشف
- 700,000 ج.س
النتيجة بتوصلك رسالة في الشات، ترسلها لشريكك أو لمحاسبك زي ما هي.
الخطوة الجاية
بوت تاني يبيع لزباينك 24 ساعة
بعد الدفتر بيجي المحل: كتالوج بصور وأسعار، طلبات، ودفع بصورة إشعار أو كاش عند التسليم. كل طلب بتأكدو بيسجّل نفسو في دفترك براهو.
كتالوج
صور وأسعار وكميات، بتحدّثو من نفس بوت الدفتر.
طلبات
الزبون يختار ويطلب، وانت بتأكد بعد ما تشوف حسابك.
توصيل
مناطق ورسوم بتحددها انت، وكاش عند التسليم موجود.
قائمة زباين
كل زبون طلب مرة يبقى في قائمتك، ترسل ليهو العروض بعدين.
الخطط
ابدأ مجاناً، وادفع لمن الشغل يكبر
كل المميزات مفتوحة في الخطط التلاتة — الفرق في الحدود بس. الأسعار بالجنيه السوداني، والدفع تحويل بنكي عادي: من صفحة الاشتراك هنا في الموقع تختار الباقة، تحوّل من تطبيق بنكك، وتكتب رقم العملية. الفريق بيشوف التحويل في كشف الحساب وبيفعّل ليك الباقة. ما في كروت ولا بوابات دفع أجنبية، والاشتراك ما بيتم جوة الشات.
موجود في كل الخطط — ما في ميزة مقفولة
- قراية الإشعارات والتأكيد بحدود حسب الخطة
- تصحيح أي حقل قريتو غلط
- دخل ومصروف نقدي ودرج النقدية
- كشف اليوم والأسبوع والشهر
- ملاحظة الأرقام المكررة
- مطابقة كشف الحساب واستيرادو بحدود حسب الخطة
- كاشيرية بعدد ما تحتاج
- لحد 5 دفاتر في نفس الحساب
- جهات التعامل بالأسماء
الأساسي
للشغل الصغير اللي حركتو معدودة — 20 صورة في الأسبوع تجربة كاملة.
مجاناً
مفتوح من أول يوم، ما محتاج كرت ولا مقدم.
- صور إشعارات في الأسبوع
- 20
- صور إشعارات في الشهر
- 80
- قرايات ذكاء اصطناعي في الشهر
- 5
- صفحات كشف حساب في الشهر
- 5
- صور في الساعة حد الرفع السريع
- 20
برو الأكتر مناسبة
للمحل اللي شغّال طول اليوم وعندو كاشير.
10,000ج.س / شهر
- صور إشعارات في اليوم
- 200
- قرايات ذكاء اصطناعي في الشهر
- 50
- صفحات كشف حساب في الشهر
- 50
- صور في الساعة حد الرفع السريع
- 60
ماكس
للحركة الكتيرة اللي بتوصل مئات الصور في اليوم.
40,000ج.س / شهر
- صور إشعارات في اليوم
- 500
- قرايات ذكاء اصطناعي في الشهر
- 300
- صفحات كشف حساب في الشهر
- 200
- صور في الساعة حد الرفع السريع
- 120
صورة الإشعار بتتحسب مرة واحدة لكل صورة ترسلها. في الباقة المجانية الحد 20 صورة في الأسبوع (بيصفّر كل سبت) وما بيزيد عن 80 في الشهر؛ في برو وماكس الحد يومي وبيصفّر كل يوم في نص الليل بتوقيت دفترك. قراية الذكاء الاصطناعي بتتحسب بس لمن الصورة تكون صعبة والقوالب ما تقدر تقراها — الصور العادية ما بتاكل من الحد دا. القرايات وصفحات كشف الحساب بتتحسب على آخر 30 يوم. لو وصلت الحد بقول ليك في الشات. والاشتراك بيغطي كل دفاترك — لو عندك محل ودفتر شخصي وأكتر، الباقة بتشتغل عليهم كلهم، والحدود دي مشتركة بينهم (مش لكل دفتر لوحدو).
أسئلة بتتسأل كتير
لازم أنزّل تطبيق؟
لأ. عباس بيشتغل جوة تلقرام، فأي تلفون فيهو تلقرام يكفي.
بتقرا كل البنوك؟
بقرا قوالب البنوك والمحافظ المشهورة زي بنكك وفوري وأوكاش، وأي إشعار تاني بحاول أقراهو وأوريك النتيجة قبل التسجيل. لو ما قدرت، تكتب المبلغ يدوي وما بتضيع عليك عملية.
بتقول لي الإشعار دا صحيح؟
لأ. الصورة ممكن تتعدّل، وما في زول بقدر يجزم ليك من صورة بس. أنا بلاحظ التكرار والحاجات المريبة وأوريك ليها، والحسم بيجي من كشف حسابك ومن المطابقة.
قروشي وبياناتي محفوظة؟
الدفتر بتاعك براك. الكاشير بيسجّل ويأكد بس — التقارير وكشف العمليات ما بيفتحها، وعملية اتأكدت ما بيقدر يعدّلها. الصور نفسها محفوظة في تلقرام، وأنا بحتفظ بالحقول اللي أكدتها.
الحدود بتتحسب كيف؟
في الباقة المجانية صور الإشعارات بتتحسب لكل أسبوع (بيبدأ السبت) بحد 20 صورة، وفي حد شهري 80 صورة. في برو وماكس الحد يومي وبيصفّر في نص الليل بتوقيت دفترك. قرايات الذكاء الاصطناعي وصفحات كشف الحساب بتتحسب على آخر 30 يوم. والحدود دي مشتركة بين كل دفاترك، لأن الاشتراك بيغطيهم كلهم. تقدر تشوف المستهلك عندك في أي وقت من أمر /plan في الشات.
الدفع كيف؟
من صفحة الاشتراك في الموقع: تختار الباقة، تحوّل بنكك، وتكتب رقم العملية. الفريق بيشوف التحويل في كشف الحساب وبيفعّل ليك الباقة — عادةً في نفس اليوم. ما في كروت ولا بوابات دفع أجنبية، والاشتراك ما بيتم جوة الشات.
جرّبني اليوم على عمليات يومك
افتح الشات، اكتب اسم شغلك — دكان، محل، مكتب، ورشة، أو مشروع شغال من البيت — وأول إشعار ترسلو لي بيتسجّل في دفترك. لو ما عجبك الشغل، ما في حاجة تلغيها.
في الغالب بقرا الإشعار كامل من أول مرة. ونادر جداً لو صورة تعبانة ما قدرت أقراها، بقول ليك طوالي وتكتب المبلغ بنفسك. ما بخمّن. واللي ما بحصل أبداً إني أقول ليك إن إشعار «متحقق» أو «مضمون».