المستندات القانونية

سياسة الخصوصية

آخر تحديث: ٢٦ يوليو ٢٠٢٦ · بتنطبق على بوت تلقرام @abbassakbot وعلى الموقع دا.

١) منو المسؤول عن بياناتك

عباس المحاسب منتج من تطوير DT+، وكالة سودانية. أي سؤال أو طلب بخصوص بياناتك بيمشي ليها مباشرة: +249912816697، أو من داخل البوت بأمر /support (الرد بيجيك في نفس المحادثة).

٢) البيانات اللي بنجمعها

من تلقرام

• رقم حسابك في تلقرام (المعرّف الرقمي) واسمك المعروض — بيجونا من تلقرام أول ما تفتح البوت.
• رقم تلفونك — لو إنت اخترت تشاركو معانا. مشاركتو اختيارية والخدمة بتشتغل من غيرو.
• نصوص رسايلك للبوت في مسار «تواصل مع الفريق» بس، وردود الفريق عليها.

من دفترك

• اسم الدفتر أو المحل، ونوعو (نشاط تجاري / دفتر شخصي)، والمنطقة الزمنية، ورصيد الدرج الافتتاحي.
• العمليات: المبلغ، النوع (دخل/مصروف)، التصنيف، التاريخ والوقت، الملاحظات.
• أرقام الحسابات البنكية اللي بتسجّلها كحساباتك، وأسماء جهات التعامل اللي بتسمّيها إنت.
• عضوية الفريق: منو الكاشير في أي دفتر ودورو.

من صور الإشعارات وكشوف الحساب

• الحقول المقروءة من الصورة: المبلغ، رقم العملية (المرجع)، التاريخ والوقت، اسم البنك أو المحفظة.
• بيانات طرف تالت: إشعار التحويل فيهو غالباً اسم ورقم حساب الطرف التاني في العملية. لمن بترسل الصورة، البيانات دي بتتخزّن في دفترك. إنت المسؤول عن إنك ما ترسل صورة ما مرتاح لمشاركتها، والاحتفاظ بيها عندنا لخدمة دفترك إنت بس.
• الصورة نفسها ما بتتخزّن في سيرفراتنا — بنخزّن مرجع الصورة عند تلقرام (file id) عشان نعرضها ليك تاني، وبتفضل محفوظة في تلقرام حسب سياساتهم. بنخزّن كمان بصمة تعريف الصورة عشان نمنع تسجيل نفس الإشعار مرتين.

من استخدامك للخدمة

• عدّادات الاستهلاك (كم صورة، كم قراءة ذكية، كم صفحة كشف) عشان نحسب حدود باقتك.
• آثار تقنية مختصرة عن فشل القراءة، لتحسين دقة القراءة.

لو اشتركت من الموقع

• رقم عملية التحويل والمبلغ المُعلن، والباقة والمدة.
• التعريف اللي كتبتو (رقم تلفون أو اسم المحل) ووسيلة التواصل — عشان نربط الدفعة بدفترك ونتواصل معاك لو في لبس.
• عنوان الـ IP بتاعك بيتسجّل مؤقتاً (أقل من ساعتين) عشان نمنع إساءة استخدام النموذج.

ما بنجمع موقعك الجغرافي، وما بنستخدم كوكيز تتبّع ولا أدوات تحليلات في الموقع دا.

٣) ليه بنجمعها

• عشان نقدّم الخدمة نفسها: قراءة الإشعارات، مسك الدفتر، التقارير، المطابقة.
• عشان نحسب حدود الباقة ونفعّل الاشتراك لمن تدفع.
• عشان نرد على استفساراتك ونحل مشاكلك.
• عشان نحمي الخدمة من الإساءة والاستخدام الآلي.
• عشان نطوّر دقة القراءة — بنراجع أنماط الفشل، ما بنبيع ولا بنشارك محتوى دفترك.

٤) الجهات اللي بتوصلها بياناتك

عشان الخدمة تشتغل، بنستعين بمزوّدين تقنيين. دي القائمة الكاملة:

• تلقرام (Telegram) — المحادثة نفسها والصور. أي حاجة بترسلها للبوت بتمر عبر تلقرام وبتخضع لسياسة خصوصيتهم.
• Cloudflare — استضافة الخدمة وقاعدة البيانات والموقع، وخدمة التحقق «إنك مش روبوت» في نموذج الاشتراك.
• OCR.space — قراءة النصوص من صور الإشعارات (المسار الأساسي).
• Google (Gemini API) — قراءة الصور الصعبة وصفحات كشف الحساب، لمن القراءة العادية ما تنفع.
• OpenRouter — مزوّد قراءة بديل بيشتغل لمن الأول ما متاح.

الصورة أو صفحة الكشف بترسل للمزوّدين دول وقت القراءة بس، ومن غير اسمك ولا رقمك. سيرفراتهم غالباً برّة السودان. ما بنبيع بياناتك لأي جهة، وما بنشاركها مع معلنين، وما بنسلّمها لأي طرف تالت غير المذكورين فوق إلا لو صدر أمر قانوني ملزم.

٥) قاعدة تفضل قدر شنو

• عمليات دفترك: باقية طول ما حسابك شغال — دا دفترك، ومسحو تلقائياً بيضيّع عليك تاريخك.
• عدّادات الاستهلاك: بتتمسح تلقائياً بعد ٩٠ يوم.
• طابور الإشعارات والتذكيرات: بيتمسح بعد أسبوع من إرسالو.
• سجل منع تكرار الطلبات في الموقع (IP): أقل من ساعتين — بيتمسح مع كل طلب جديد.
• رسايل «تواصل مع الفريق»: بتفضل كسجل للدعم عشان نقدر نرجع لمشكلتك لو تكررت.
• سجل إجراءات الإدارة: منو من الفريق عمل شنو ومتين — دا سجل حماية ليك، وبيفضل.
• طلبات الاشتراك: بتفضل كسجل مالي طول ما الاشتراك ساري وبعدو لأغراض المحاسبة.
• نسخ احتياطية: بنحتفظ بنسخ من قاعدة البيانات لحماية دفترك من الضياع؛ الحذف بيوصلها في دورة النسخ التالية.

٦) حقوقك

• نسخة من بياناتك: تقدر تصدّر دفترك كامل CSV من الإعدادات في البوت في أي وقت، بدون ما تطلب من أي زول.
• التصحيح: أي عملية تقدر تعدّلها أو تحذفها بنفسك من «كشف العمليات».
• المسح: اطلب مسح دفترك وحسابك بالكامل من /support أو على رقم DT+، وبنمسحو.
• سحب مشاركة التلفون: تقدر تطلب حذف رقم تلفونك ونحن بنمسحو والخدمة بتفضل شغالة.

٧) أمان بياناتك

الاتصال كلو مشفّر (HTTPS)، والوصول لقاعدة البيانات محصور في فريق DT+ ومربوط بقائمة صلاحيات محدودة داخل البوت. ومع دا، ما في خدمة على الإنترنت بتقدر تضمن أمان مطلق — فما ترسل للبوت صور ما مستعد لمخاطرة مشاركتها.

٨) الأطفال

الخدمة موجّهة لأصحاب الأنشطة التجارية البالغين (١٨ سنة فما فوق)، وما مصمّمة للأطفال.

٩) تعديلات على السياسة دي

لو غيّرنا حاجة جوهرية — زي إضافة مزوّد جديد بتوصلو بياناتك — بنحدّث الصفحة دي وبنعلن التغيير داخل البوت. تاريخ آخر تحديث دايماً مكتوب فوق.